Turizm və sosiologiya sahələri üzrə elmi dərəcəyə malik olan Florian Sengstschmid son 20 il ərzində, demək olar ki, turizm sektorunun bütün sahələrində çalışıb. O, peşəkar karyeraya özəl sektordan başlamışdır. Öncə Avstriyada yeni, təşviqedici turlar üzrə operator kimi çalışmış, daha sonra isə beynəlxalq, 5 ulduzlu lüks hoteldə satış və marketinq şöbəsinə rəhbərlik etmişdir.
1999-cu ildə Avstriya Milli Turizm Bürosunun MDB ölkələrindəki təmsilçisi seçilmiş və eyni zamanda Avstriyanın Rusiyadakı səfirliyində maliyyə attaşesi vəzifəsində çalışmışdır.
2003-cü ildə Vyanaya qayıdaraq Avstriya Milli Turizm Bürosunun baş ofisində beynəlxalq bazarlar və tərəfdaşlarla əlaqələrin tənzimlənməsi şöbəsinə rəhbərlik etmişdir.
2006-cı ildə özünün şəxsi konsaltinq şirkətini təsis edərək dövlət orqanlarına, o cümlədən Avropa İttifaqı və Birləşmiş Millətlər Təşkilatı kimi bir sıra qurumlara turizm potensialının təşviqi və destinasiya idarəetməsi sahələrində xidmətlər göstərmişdir.
Cənab Zenqstşmit Estoniya, Yunanıstan, Vyetnam, Butan, Macarıstan, Litva, Gürcüstan da daxil olmaqla, bir sıra ölkələrə öz dəstəyini əsirgəməmişdir. Bir müddət sonra o, ölkəmizin turizm sənayesini gücləndirmək məqsədilə Avstriya və Azərbaycan arasında Avropa İttifaqının Tvinninq layihəsinə rəhbərlik etmişdir.Bu layihə başa çatdıqdan sonra keçmiş Mədəniyyət və Turizm Nazirliyi yanında Azərbaycan Konqreslər Bürosunu təsis etmişdir. “Pasha Travel” şirkətində baş icraçı direktor vəzifəsində işlədikdən sonra, 2018-ci ilin aprel ayında Azərbaycan Turizm Bürosuna baş icraçı direktor təyin olunmuşdur.
