19 avq 2025
Please select your language of preference.
Azərbaycan Turizm Bürosu (ATB) dünya üzrə aparıcı lüks səyahət agentlikləri şəbəkəsi olan Virtuoso ilə əməkdaşlıqda yeni beynəlxalq marketinq kampaniyasına başlayıb. Kontinental Avropa, Böyük Britaniya və İrlandiya, Çin, Asiya, həmçinin Latın Amerikası və Karib hövzəsi (LAC) kimi əsas bazarları hədəfləyən bu kampaniya Azərbaycanı lüks səyahət təcrübələri üçün aparıcı destinasiya kimi tanıtdırmağa yönəlib.
Virtuoso-nun geniş şəbəkəsi 50-dən çox ölkəni əhatə edir və özündə 20,000-dən çox yüksək səviyyəli səyahət məsləhətçisi ilə 2,200 elit səyahət təchizatçısını birləşdirir. Fərdi və təcrübəyə əsaslanan səyahətlərə fokuslanması ilə tanınan Virtuoso, yüksək gəlirli səyahətçiləri dünya üzrə unikal və eksklüziv təkliflərlə əlaqələndirir. Bu əməkdaşlıq vasitəsilə Azərbaycan fərdi və yüksək keyfiyyətli səyahət təcrübələri axtaran qlobal lüks səyahətçi auditoriyasına təqdim olunacaq.
Kampaniya məlumatlılığın və tələbatın artırılmasına yönəlmiş müxtəlif strateji marketinq təşəbbüslərini əhatə edəcək. Bunlara Virtuoso-nun səyahət məsləhətçilərinə yönəlmiş xüsusi B2B e-poçt təşviqatları, eləcə də Avropa, Çin və Latın Amerikası bazarları üçün uyğunlaşdırılmış canlı vebinarlar və e-öyrənmə modulları kimi peşəkar inkişaf fəaliyyətləri daxildir. Bu səylər məsləhətçilərin biliklərini artırmaq və Azərbaycana olan rezervasiyaların sayını çoxaltmaq məqsədi daşıyır.
Əməkdaşlıq çərçivəsində Azərbaycan, aparıcı səyahət məsləhətçilərinin istifadə etdiyi qlobal platforma olan Virtuoso.com-da xüsusi təyinat profili vasitəsilə tanıdılacaq. Əlavə tanıtım imkanları Virtuoso-nun qlobal elektron bülletenlərində və Wanderlist platformasında potensial paylaşımlar vasitəsilə təmin ediləcək. Ən əsası isə bu tərəfdaşlıq Azərbaycan üçün Virtuoso-nun güclü qlobal lüks səyahət məsləhətçiləri şəbəkəsinə birbaşa çıxış imkanı yaradaraq, ölkəmizin seçici səyahətçiləri cəlb etməsi üçün dəyərli bir kanal təklif edir.